မိန်းမသားဘ၀(စ/ဆုံး)

မိန်းမသားဘ၀(စ/ဆုံး)

“မင်း မကျေနပ်ဘူးလား မင်းမကျေနပ်ရင် မနက်မိုးလင်းတာနဲ့ မင်းကို ကွာရှင်းပေးမယ် မင်းကြိုက်တဲ့အချိန်ကွာရှင်းလို့ရတယ် သိလား” ကြားလိုက်ရတဲ့ စကားက ဒေါသတွေ ပွက်ပွက်ဆူရုံမက ကျမ အငွေ့ပါ ဖြစ်သွားမလားပဲ။ “တောက် ဒီလူ လူပါး၀လိုက်တာ” ကလေးသာ မရှိခဲ့သေးရင် ကျမဘ၀အတွက် သားကလေးသာ မမွေးခဲ့သေးရင် ဒီလူ့မျက်နှာကို ကွာရှင်းစာချုပ်နဲ့ ပစ်ပေါက်လိုက်ပြီ။ အခုတော့ ထိုင်တတ်စအရွယ် သားကလေးအတွက် တွေးရင်း ကျမ ဒေါသတွေကို နှလုံးသားရဲ့ အနက်ရှိုင်းဆုံးနေရာမှ မြှပ်နှံလိုက်တယ်။

ပျော်စရာတစ်စက်မှမရှိတဲ့ မွန်းကြပ်မှုတွေအပြည့်နဲ့ အိမ်ထောင်ရေး။ ကျမ သားကလေးအတွက် ကျမ ဟန်ဆောင်ပြုံးရအုံးမယ်။ လူတွေအမြင်မှာ ကျမဟာ အိမ်ထောင်ရေး ကံကောင်းတဲ့ မိနိးမ တစ်ယောက် လုပ်ချင်တာ မှန်သမျှ လုပ်ခွင့်ရနေတဲ့ မိန်းမတစ်ယောက်။ ဒါပေမဲ့ ကျမဟာ သိပ်မောပန်းနေပြီ ဆိုတာ ဘယ်သူသိမှာလဲ။ မနက်ကျတော့ သူက ဘာမှမဖြစ်ခဲ့သလို။ ကျမဘ၀ရဲ့ သိက္ခာနဲ့ တန်ဖိုးတွေ ပျောက်ဆုံးခဲ့တာ သားကလေးမွေးကတည်းကပါပဲ။

သားကလေးအတွက် ကျမ ခေါင်းငုံ့ခံ။ အနင်းချေခံခဲ့တယ်။ ရှိစေတော့။ ကျမက အမေတစ်ယောက်ပဲလေ။ ကျမ တစ်ယောက်တည်းရဲ့ အစွမ်းအစနဲ့ သားကလေးကို တင့်တင့်တယ်တယ်မထားနိုင်သေးသရွေ့ ကျမ ခေါင်းငုံ့ခံနေမှာပဲ။ ဒါဟာ ကျမ ကျမ ဒီလူ့ကို ချစ်လို့ ဖက်တွယ်ချင်လို့မဟုတ်သလို ကျမ သိက္ခာ ကျမ ဖြစ်တည်မှုဟာ သိပ်အပေါစားဆန်နေလို့လဲ မဟုတ်ဘူး ကျမ ရဲ့ အညံ့ခံမှုတွေဟာ ကျမ သားဘ၀ အတွက်။

မနက်စာ စားနေရင်းနဲ့ ကျမရဲ့ အမျိုးသားဆိုတဲ့လူက “မင်း ကိုနဲ့ အပြင်ကို အတူမသွားတာ ‌နှစ်နဲ့ချီနေပြီ ညနေ မင်း ကျောင်းပြန်လာရင် အပြင်သွားကြရအောင်” “ကျမ ပင်ပန်းလိူ့ပါ ကျောင်းမှာစာသင်ရတာ နားရတဲ့အချိန်မရှိဘူးလေ နေ့လည်ကျောင်းဆင်းချိန်မှာတောင် ကျမမှာ အမှတ်ခြစ်နေရတာ ထမင်းတောင် ရေနဲ့မျှောချသလိုစားနေရတာ အိမ်ပြန်ရောက်ရင် ကျမ နားချင်ပြီ ” “မင်းတစ်ယောက်တည်း အလုပ်လုပ်ရတာ မဟုတ်ပါဘူးကွာ တစ်ကမ္ဘာလုံးကမိန်းမတွေ အလုပ်လုပ်ကြတာပဲ မင်းက သူများထက်ကို ထူးတဲ့မိန်းမ” ကျမ ဆက်ပြောရင် ဒီလူနဲ့ ရန်ဖြစ်တော့မယ်။ဒီလူနဲ့ ကျမ ရန်ဖြစ်ရတာ ကိစ္စမရှိဘူး ။

သားကလေးက အသံကျယ်ကျယ်တွေဆ်ုရင် သိပ်ကြောက်တတ်တယ်။ “အင်း ကျမက တခြားမိန်းမတွေလောက် မတော်ဘူးလေ” “အဟုတ်ပဲလေ မင်းက အသုံးမှမကျတာ” ဒီလူ့ကို ကြည့်ရင်း ကျမ ရီချင်လ်ုက်တာလေ။ ကျမဟာ သူနဲ့ လမ်းတွဲမလျှာက်တဲ့ အကြောငါးအရင်းကို စိတ်လွတ်ကိုယ်လွတ်‌ပြောချင်လိုက်တာလေ။ ကျမနဲ့ သားကလေးကို ဘေးမှာထားပြီး တခြားသော မိန်းမတွေကို မျက်လုံးကျွတ်မတတ် လိုက်ကြည့်တတ်တဲ့ ဇ ပိုင်ရှင်နဲ့ လမ်းတွဲလျှောက်ရလောက်တဲ့အထိ ကျမ အသိမမဲ့သေးဘူး သိက္ခာမမဲ့သေးဘူး လို့ ပြောပြချင်လိုက်တာလေ။

မိန်းမ‌တစ်ယောက်ရဲ့ သိက္ခာကို ကိုယ်တိုင်ချနေတဲ့ ခင်ပွန်း အမည်ခံ လူတစ်ယောက်နဲ့ ညနေခင်းအပျော်လမ်းလျှောက်ထွက်ဖို့ ကျမက အရှက်မမဲ့သေးဘူးဆိုတာ ဒီလူ့ကို သိစေချင်လိုက်တာ။ ကျမတို့ရဲ့ အမည်ခံအိမ်ထောင်ရေးကို စဉ်းစားမိတော့ ကျမနဲ့ရင်းနှီးတဲ့ အမတစ်ယောက် အကြောင်းကို သတိရလာတယ် အဲ့အမက တကယ်ငွေရှာကောင်းတယ် သူ့မိသားစုကိုလဲ တင့်တင့်တယ် ထားနိုင်တယ် အဲ့အမရဲ့ ခင်ပွန်းက အမကို အတော်လေးကို အနိုင်ကျင့်သလို စာနာမှုလုံး၀ မရှိတာပါ ကြာလာတော့ ကျမက မနေနိုင်မထိုင်နိုင်ပြောမိပါတယ် “အမရယ် အမလဲ ပိုက်ဆံရတတ်နေတာပဲလေ အဲ့ယောက်ျားကို ကွာလိုက်ပါလား အမမှာသူမရှိလဲ ဘာမှမနစ်နာဘူးလေ

အမပဲရှာကျွေးနေရတာကို” လို့ပြောတော့ အဲ့အမက ကျမကို ကြည့်ပြီး “ညီမလေးက အိမ်ထောင်မကျသေးတော့ မသိသေးတာပါ အမသူ့ကို အရမ်းမေတ္တာရှိခဲ့ပေမဲ့ အခုချိန်မှာတော့ အမသူ့ကို မလိုအပ်တော့ဘူး အမအတွက် သူ့ကိုမလိုအပ်ပေမဲ့ အမ သမီးတွေအတွက် သူတို့အဖေကို လိုအပ်တယ်လေ ငါ့သမီးတေက အပျိုလေးတွေဖြစ်နေပြီ လူတွေကြားမှာ မျက်နှာငယ်မဲ့အလုပ်ငါမလုပ်ဘူး ငါပိုက်ဆံရှာရလို့ သေရင်သေသွားပစေ”တဲ့ အဲ့အချိန်တုန်းကတော့ အဲ့အမပြောတော ကျမ လုံး၀နားမလည်ခဲ့ပါဘူး ပါးစပ်ကသာ ဟုတ်ကဲ့ ဟုတ်ကဲ့ လို့ပြောခဲ့ပေမဲ့ စိတ်ထဲကတော့ အလကားလင်တရူးမလို့ ပြောခဲ့မိသေးတယ် အခု အဲ့အမ နေရာ ကျမ ရောက်လာခဲ့ပြီ။ အမ အတွက် သူ့ကို မလိုအပ်တော့ဘူး ဆိုတဲ့ စကားကို ကျမ အပြည့်အ၀ လက်ခံလိုက်ပါပြီ။

ကိုယ့်အပေါ် စာနာမှုမရှိတဲ့ လင်ယောက်ျားကို ဘယ်မိန်းမက ဖက်တွယ်နေချင်ပါ့မလဲ။ ပြောမပြနိုင်တဲ့ အကြောင်းကြောင်းကြောင့် အိမ်ထောင်ရေးထဲက ရုန်းမထွက်ကြတာကို ကျမ ကောင်းကောင်းနားလည်ခဲ့ပြီ။ ကျမကရော ကျမအပေါ်မချစ်သော ကျမကလဲ ခံစားချက်မရှိတော့သော လူတစ်ယောက်နဲ့ အိမ်ထောင် ဆိုတဲ့ အကျဉ်းခန်းထဲမှာ ကိုယ်ါကိုယ်ကို ပိတ်ထားနေပါလား။

ဖောက်ထွက်ဖို့ သတ္တိမရှိဘူးလားလို့ ကိုယ့်ကိုယ်မေးကြည့်မိတယ် ဟင့်အင်း ကျမ စွမ်းရည်မလုံလောက်သေးဘူးလေ ကျမ သားကလေးကို ပြည့်စုံတဲ့ဘ၀မှာ ထားနိုင်ဖို့ ကျမ ကြိုးစားနေတုန်းပဲ ကျမ ဆန္ဒတွေပြည့်တဲ့တစ်ချိန် ကျမဟာ ဒီလူပြောနေကျစကားထဲကလို အသုံးမကျတဲ့ မိန်းမ သုံးစားမရတဲ့ မိန်းမ မဟုတ်ဘူး ဆိုတာ ဒီလူ သိခွင့်ရလာမှာပါ တကယ်တော့ ကျမတို့ မိန်းမသားတွေဟာ ခန္ဓာကိုယ်ပိုင်းအရသာ အားနည်းကြလိမ့်မယ်။

စိတ်ဓာတ်ကတော့ သိပ်ကို သန်မာကြပါတယ်။ မိခင်တစ်ယောက်ဖြစ်သွားရင် ပြောမပြနိုင်အောင်ကို သန်မာကြပါတယ် မချစ်သောသူနဲ့ မနှစ်ခြိုက်တဲ့ အိမ်ထောင်ရေးကို သည်းခံနေကြရတဲ့ မိန်းမတွေ ၊ လောကအမောတွေကြားမှာ တစ်ယောက်တည်း ရုန်းကန်ပြီး သားသမီးကို ရှာဖွေကျွေးမွေးနေကြတဲ့ မိခင်တွေ၊ ယောက်ျားတွေနဲ့ ရင်ဘောင်တန်းပြီး လုပ်ကိုင်ရှာဖွေနေကြရတဲ့ မိန်းမတွေ၊ ဒီလောက်သတ္တိအပြည့်နဲ့ မိန်းမတွေဟာ အနည်းဆုံးတော့ လေးစားခံကြရသင့်ပါတယ်။ အိမ်ထောင်ဦးစီး ဆိုသူတွေရဲ့ အနှိမ်ခံ၊ လှောင်ပြောင်ခံရတဲ့ ကိုယ်ပိုင် ဆုံးဖြတ်ချက်ဆိုတာ ဘာမှန်းမသိတဲ့ မိန်းမအဖြစ် ကုန်ဆုံးဖို့ရာ တကယ်မတန်ပါဘူး “ပြောရအုံးမယ် ကျမတို့အိမ်က ကလေးထိန်းက သူ ပြန်တော့မယ်လို့ပြောနေတယ်

သူ ပြန်သွားလို့ နောက်ကလေးထိန်း မရောက်သေးတဲ့အချိန်လေး ကျမ အလုပ်က ခွင့်ယူပြီး ကလေးထိန်းချင်လို့ ” “ဟ ဘယ်ဖြစ်မလဲကွ အဲ့ ကလေးထိန်းကို မပြန်အောင် သူ ပျော်အောင်ထားလေ” “ဘာ ကျမက သူ့ကို အတင်းပြန်ခိုင်းတာမဟုတ်ဘူး သူ့သဘောနဲ့သူ ပြန်မယ်ပြောနေတာ ” “မင်းတားရမှာလေ သူပြန်သွားရင် မင်းရော ငါရော အလုပ်ပျက်မယ်ကွ မင်းခေါင်းမရှိဘူးလား ” “ဒါဆို ကျမက သူ့ကို မပြန်ရဘူးလို့ တားလို့ သူက ကလေးထိန်းဖို့စိတ်မပါတော့လို့ ကလေးထိန်းနေတဲ့အချိန် ကျမကလေး ထိခိုက်မိရင်ရော ရှင် တာ၀န်ယူမှာလား” “ငါက ဘာကိစ္စ တာ၀န်ယူရမှာလဲ ” “မယူလို့မရဘူးလေ သူပြန်မယ်ဆိုတာ ရှင်အတင်းဆွဲထားပြီး ကလေးထိန်းခိုင်းတာ သူစိတ်မ၀င်စားတော့လို့ ကျမကလေး ထိခိုက်မိရင် ရှင်တာ၀န်ယူရမယ်”

“အေး တာ၀န်မယူနိုင်ဘူး မင်းလဲ ခွင့်မယူရဘူး ” “ငါတို့ ဒီကလေးကို ယူကို မယူခဲ့သင့်တာပါကွာ” တောက် ဒီလူကို ကျမ မုန်းလိုက်တာ ကျမရှေ့က ကော်ဖီပူပူ ပန်းကန်နဲ့ ဒီလူ့ မျက်နှာကို ပစ်ပေါက်ချင်လိုက်တာ “ကိစ္စမရှိဘူး ကျမဘာသာ ကျမ စိတ်ချရတဲ့သူတွေက်ု ကလေးထိန်းရှာပေးဖို့ အကူအညီတောင်းမယ် ကျမသားကို ကျမ ပိုက်ဆံနဲ့ ကျွေးနိုင်တယ်သိလား ” “အေး မင်းသဘော မင်းသဘော ဖြစ်လာတဲ့ကိစ္စ ငါနဲ့ ဘာမှ မဆိုင်တော့ဘူး မေမေရေ မေမေရေ” အော်ခေါ်နေတဲ့ သားကလေးကို ကြည့်ရင်း ကျမ သနားလိုက်တာလေ။ ရင်တွေ ကွဲမတတ်ပဲ။ ဘာမှ မသိသေးတဲ့ သားကလေးကတော့ ဖေဖေ ရေ ဖေဖေရေ လို့ ခေါ်ရင်း ချီခိုင်းနေလေရဲ့။ ။

လရိပ်-သံတွဲ ၂၆.၁၁.၂၀၂၃